नंदुरबार: नंदुरबार जिल्ह्यामध्ये मागील काही दिवसांपासून सुरू असलेल्या अतिवृष्टीमुळे झालेल्या शेतमालाच्या प्रचंड नुकसानीची गंभीर दखल घेत, शिवसेना (उद्धव बाळासाहेब ठाकरे) पक्षाने नंदुरबार जिल्ह्यामध्ये तातडीने 'ओला दुष्काळ' जाहीर करण्याची मागणी केली आहे. या मागणीचे निवेदन पालकमंत्री माणिकराव कोकाटे यांना देण्यात आले आहे.
अतिवृष्टीमुळे शेतकऱ्यांच्या हातातोंडाशी आलेले पीक अक्षरशः मातीमोल झाले आहे. शेतांमध्ये पाणी घुसल्याने केळी, ऊस, पपई, कापूस, सोयाबीन, मूग, मका, उडीद यांसारखी सर्व पिके वाया गेली आहेत. या नैसर्गिक आपत्तीमुळे शेतकरी मोठ्या प्रमाणावर कर्जबाजारी झाला असून, कुटुंबाचा आणि संसाराचा गाडा कसा चालवावा, असा मोठा प्रश्न त्यांच्यासमोर उभा ठाकला आहे. त्यांचे संसार उघड्यावर पडल्याची तीव्र भावना निवेदनात व्यक्त करण्यात आली आहे.
प्रमुख मागण्या आणि पक्षाचा इशारा
शिवसेना (उबाठा) पक्षाने निवेदनाद्वारे पालकमंत्री कोकाटे यांच्याकडे दोन प्रमुख मागण्या केल्या आहेत:
१. नंदुरबार जिल्हा 'ओला दुष्काळ' म्हणून त्वरित जाहीर करावा.
२. शेतकऱ्यांना तातडीने प्रति शेतकरी $५०,०००/- (पन्नास हजार रुपये) नुकसान भरपाई त्यांच्या खात्यावर जमा करावी, जेणेकरून त्यांची आगामी दिवाळी गोड होईल.
३. निवेदनात, महाराष्ट्र मुख्यमंत्र्यांनी सरकार स्थापन करताना दिलेले शेतकऱ्यांचा ७/१२ कोरा करण्याचे आश्वासन पूर्ण करण्याची ही योग्य वेळ असल्याचे नम्रपणे नमूद करण्यात आले आहे.
या मागण्या मान्य न झाल्यास शिवसेना (उबाठा) पक्षाने तीव्र आंदोलनाचा इशारा दिला आहे. जर ओला दुष्काळ त्वरित जाहीर करून शेतकऱ्यांना नुकसान भरपाई लवकर दिली नाही, तर जिल्हा कृषी अधिकारी कार्यालयाला 'ताळेठोक' आंदोलन आणि तीव्र 'रास्तारोको' आंदोलन करण्यात येईल. यातून निर्माण होणाऱ्या परिणामांना प्रशासन स्वतः जबाबदार असेल, अशी स्पष्ट नोंद घेण्यास सांगण्यात आले आहे.
हे निवेदन देताना शिवसेना महानगर प्रमुख पंडित माळी, नाना पाटील, निंबा माळी, वासुदेव पाटील, चेतन पाटील, सुरेश घाटे, युवराज माळी, निंबा पटेल यांच्यासह अनेक शेतकरी उपस्थित होते. नंदुरबारच्या शेतकऱ्यांना न्याय मिळेपर्यंत लढा सुरूच ठेवण्याचा निर्धार यावेळी व्यक्त करण्यात आला.
आता पुढे शासन या मागणीवर काय निर्णय घेते आणि शेतकऱ्यांना दिवाळीपूर्वी दिलासा मिळतो का, हे पाहणे महत्त्वाचे ठरणार आहे.
Post a Comment
0 Comments