नासिक येथे कवी योगेश जाधव यांच्या ‘पिंपळ’ काव्यसंग्रहाचे प्रकाशन: सुहास टिपरे यांच्या अध्यक्षतेखाली सोहळा संपन्न

संपादकीय 

 नाशिक: २१ जून रोजी नाशिक येथे युवा कवी योगेश जाधव यांच्या ‘पिंपळ’ या काव्यसंग्रहाचे प्रकाशन ज्येष्ठ साहित्यिक सुहास टिपरे यांच्या अध्यक्षतेखाली आणि कवी वैद्यराज भूपाल देशमुख यांच्या हस्ते थाटामाटात संपन्न झाले. डॉ. श्रीकृष्ण सिन्नरकर महाराज यांच्या हिंद भूमी, म्हसरूळ येथील निवासस्थानी या सोहळ्याचे आयोजन करण्यात आले होते.

साहित्यनिर्मिती: सरस्वतीचा आशीर्वाद आणि लेखकाची सामाजिक जबाबदारी

कार्यक्रमाचे अध्यक्षस्थान भूषवताना ज्येष्ठ साहित्यिक सुहास टिपरे यांनी, "चांगल्या पुस्तकाची निर्मिती ही सरस्वतीच्या आशीर्वादाशिवाय शक्य नाही," असे प्रतिपादन केले. स्वातंत्र्यवीर सावरकर यांनी अंदमानच्या कारागृहात ‘काळे पाणी’ आणि लोकमान्य टिळक यांनी मंडालेच्या तुरुंगात ‘गीता रहस्य’ यांसारख्या साहित्यकृती प्रतिकूल परिस्थितीतही निर्माण केल्याचा उल्लेख करत टिपरे म्हणाले, "आज आपल्याकडे सकारात्मक वातावरण, प्रगत तांत्रिक सुविधा, वाचनालये आणि पुस्तके सहज उपलब्ध असतानाही आपण उत्तम साहित्य निर्माण करू शकत नाही का?" मराठी भाषेला अभिजात भाषेचा दर्जा लाभलेला असताना, आपण संस्कार घडवणारी आणि वाचनीय पुस्तके लिहून मराठी वाङ्मय समृद्ध करायला हवे, असे आवाहन त्यांनी केले.

पुस्तकांचे महत्त्व विशद करताना टिपरे म्हणाले की, पुस्तके नाराज आणि व्यथित मनाला आधार देतात, विनोदी पुस्तके दुःखी मनाला आनंदित करतात आणि साने गुरुजींचे ‘श्यामची आई’सारखे पुस्तक लहान वयात संस्कार घडवण्यासाठी प्रभावी ठरते. त्यामुळे चांगल्या पुस्तकांची निर्मिती होण्यासाठी सर्व साहित्यिकांनी प्रयत्न करणे आवश्यक आहे, असे मत त्यांनी व्यक्त केले.

मान्यवरांची उपस्थिती आणि मनोगते

या प्रकाशन सोहळ्याला कीर्तनचंद्रिका वैजयंती सिन्नरकर, कवी सुभाष उमरकर, आणि विडंबनकार संजय आहेर प्रमुख पाहुणे म्हणून उपस्थित होते. डॉ. भूपाल देशमुख, कीर्तनचंद्रिका वैजयंती सिन्नरकर, विडंबनकार संजय आहेर आणि कवी योगेश जाधव यांनी आपले मनोगत व्यक्त केले. अलककार सुभाष उमरकर यांनी योगेश जाधव यांच्या पुस्तकाला शुभेच्छा दिल्या. साहित्यिक किरण मेतकर यांनी या कार्यक्रमाचे दिमाखदार सूत्रसंचालन केले.

सन्मान आणि ‘वाढदिवसाचा ओटा’ कार्यक्रमाचे आकर्षण

यावेळी मान्यवरांचा सत्कार करण्यात आला. कवी योगेश जाधव यांनी वैजयंती सिन्नरकर यांचा साडी, पेन आणि गुलाब पुष्प देऊन सन्मान केला. तसेच अध्यक्ष सुहास टिपरे, प्रकाशन ज्यांच्या शुभ हस्ते झाले ते डॉ. भूपाल देशमुख, प्रमुख पाहुणे विडंबनकार संजय आहेर आणि अलककार सुभाष उमरकर यांना शाल, गुलाब पुष्प आणि पेन देऊन सन्मानित करण्यात आले. उपस्थित सर्व कवी/कवयित्रींनाही योगेश जाधव यांनी पेन आणि पुस्तक देऊन गौरवण्यात आले.

या कार्यक्रमाचे विशेष आकर्षण म्हणजे कीर्तनकार वैजयंती सिन्नरकर यांच्या घराच्या ओट्यावर आयोजित ‘वाढदिवसाचा ओटा’ हा कार्यक्रम. या ओट्यावर अनेक वाढदिवस साजरे होतात, तसेच काव्य संमेलनेही पार पडतात. याच ओट्यावर पहिल्यांदाच पुस्तक प्रकाशन सोहळ्याचे आयोजन करण्यात आले होते. या वेळी ज्यांचा वाढदिवस होता, त्यांना औक्षणही करण्यात आले.

कविसंमेलन आणि सांगता

कार्यक्रमाच्या शेवटी एक बहारदार कविसंमेलन पार पडले, ज्यात अनेक कवींनी आपल्या सुंदर रचना सादर करत कार्यक्रमाची रंगत वाढवली. कवयित्री अलका दराडे, गझलकार अजय बिरारी, कवी निशांत गुरु, कवी विलास पंचभाई, कवी सोमनाथ पगार, कवयित्री कविता कासार, श्री. निजामपूरकर, कवी अरुण घोडेराव, कवी गोरख पालवे, जादूगार अभिजित कन्नडकर, सौ. आहेर, भाऊराव साळवे, कवी रतन हिरे, क्षितिजा खटावकर, सोनाली भट यांसह अनेक साहित्यिक या सोहळ्याला उपस्थित होते. वैजयंती सिन्नरकर यांनी आभार प्रदर्शन केले आणि नाष्टा व चहापानानंतर कार्यक्रमाची सांगता झाली.