इंद्रजीतसिंग बावरी हत्या प्रकरण: धुळ्यातून उच्चस्तरीय चौकशीची मागणी; मुख्यमंत्र्यांना जिल्हाधिकाऱ्यांमार्फत निवेदन

 धुळे (सहसंपादक - अनिल बोराडे):

नांदेड येथील दूध डेअरी परिसरातील धनगाव पेट्रोल पंपावर माजी सैनिक बलजीतसिंग बावरी यांचा मुलगा इंद्रजीतसिंग बलजीतसिंग बावरी यांची झालेल्या निर्घृण हत्येमुळे राज्यभरात खळबळ उडाली आहे. या प्रकरणातील मुख्य सूत्रधारांसह सर्व आरोपींना तातडीने अटक करून कठोर कारवाई करावी, तसेच या संपूर्ण प्रकरणाची निष्पक्ष व उच्चस्तरीय चौकशी करण्यात यावी, अशी तीव्र मागणी गुरुनानक गुरुद्वारा साहिब जी, धुळे यांच्या वतीने करण्यात आली आहे.

या संदर्भात गुरुनानक गुरुद्वारा साहिब जीचे जथेदार प्रतापसिंग दयासिंग शिकलकर यांनी धुळे जिल्हाधिकाऱ्यांमार्फत राज्याचे मुख्यमंत्री देवेंद्र फडणवीस यांना निवेदन सादर केले आहे.

शीख-सिकलीगर समाजात तीव्र संताप

निवेदनात नमूद केल्यानुसार, ८ ऑगस्ट २०२६ रोजी घडलेल्या या गंभीर घटनेमुळे शीख-सिकलीगर समाजामध्ये प्रचंड आक्रोश, भीती व असुरक्षिततेची भावना निर्माण झाली आहे. देशसेवा करणाऱ्या एका माजी सैनिकाच्या मुलाची अशा प्रकारे हत्या होणे अत्यंत गंभीर बाब असून, या प्रकरणाचा तपास निष्पक्ष आणि स्वतंत्र यंत्रणेमार्फत होणे आवश्यक असल्याचे निवेदनात म्हटले आहे.

निवेदनातील प्रमुख मागण्या:

 * वरिष्ठ अधिकाऱ्याची नियुक्ती: हत्येच्या तपासासाठी नांदेड पोलीस विभागाबाहेरील किमान DIG दर्जाच्या वरिष्ठ पोलीस अधिकाऱ्याची विशेष चौकशी अधिकारी म्हणून नियुक्ती करावी. तपास अधिकाऱ्यास एफआयआर (FIR), सीसीटीव्ही (CCTV) फुटेज, कॉल डिटेल्स, तांत्रिक व फॉरेन्सिक अहवाल तपासण्याचे पूर्ण अधिकार दिले जावेत.

 * सूत्रधार व शस्त्र पुरवठादारांवर कारवाई: हत्येतील प्रत्यक्ष आरोपींसह यामागील मुख्य सूत्रधार, कटात सहभागी व्यक्ती, मदतगार आणि हत्येसाठी शस्त्रे उपलब्ध करून देणाऱ्यांचा शोध घेऊन त्यांना तातडीने गजाआड करावे.

 * फास्ट ट्रॅक न्यायालयात सुनावणी: पीडित कुटुंबाला त्वरित न्याय मिळवून देण्यासाठी हा खटला फास्ट ट्रॅक न्यायालयात चालवावा आणि दोषींना कठोरात कठोर शिक्षा होईल यासाठी प्रभावी पाठपुरावा करावा.

 * गुन्हेगारी पार्श्वभूमीची चौकशी: सर्व आरोपींच्या गुन्हेगारी पार्श्वभूमीची सखोल चौकशी करून सराईत व हिस्ट्रीशीटर गुन्हेगारांवर कायद्यानुसार कठोर कारवाई करण्यात यावी.

शासन आणि पोलीस प्रशासनाने या निवेदनाची गांभीर्याने दखल घेऊन पीडित बावरी कुटुंबाला लवकरात लवकर न्याय मिळवून द्यावा, अशी जोरदार अपेक्षा गुरुद्वारा प्रशासनाने व्यक्त केली आहे.