सहसंपादक अनिल बोराडे
दहिवेल: साक्री तालुक्यातील चिंचपाडा, बोदगाव आणि मैदाणे परिसरात गेल्या अनेक दिवसांपासून सुरू असलेल्या अनियमित वीज पुरवठ्यामुळे नागरिक आणि शेतकरी हवालदिल झाले आहेत. रात्रीच्या वेळी शेतात पाणी भरताना बिबट्यासारख्या हिंस्र प्राण्यांच्या हल्ल्याची भीती वाढत असल्याने, 'दिवसा ७ ते ८ तास वीज पुरवठा द्या' या मागणीसाठी साक्री तालुका काँग्रेस कमिटी आणि ग्रामस्थांनी महावितरण कार्यालयाला निवेदन देऊन तीव्र आंदोलनाचा इशारा दिला आहे.
शेतकऱ्यांसमोर दुहेरी संकट: वीज टंचाई आणि वन्य प्राण्यांची दहशत
या परिसरातील वीज पुरवठा वारंवार खंडित होणे आणि कमी दाबाने वीज मिळणे ही नित्याचीच बाब झाली आहे. सध्या पिकांना पाण्याची नितांत गरज असताना महावितरणकडून रात्रीच्या वेळी वीज दिली जात आहे. मात्र, परिसरात बिबट्याचा वावर मोठ्या प्रमाणात वाढल्याने रात्री शेतात जाणे जीवावर बेतणारे ठरत आहे. या संदर्भात ग्रामस्थांनी कोंडाईबारी वनविभागाचे अधिकारी भालचंद्र कुवर यांनाही निवेदन देऊन संरक्षणाची मागणी केली आहे.
जनजीवन विस्कळीत, आंदोलनाचा पवित्रा
निवेदनात नमूद केल्यानुसार, अनियमित विजेमुळे विद्यार्थ्यांचा अभ्यास खोळंबला असून लघुउद्योग आणि व्यापारी वर्गाचे मोठे नुकसान होत आहे. विशेष म्हणजे, सेवा खंडित असतानाही वीज बिले मात्र पूर्ण आणि वेळेवर आकारली जात असल्याबद्दल नागरिकांनी संताप व्यक्त केला आहे. वारंवार तक्रारी करूनही महावितरणकडून कोणतीही ठोस कारवाई होत नसल्याने अखेर नागरिकांनी ठिय्या आंदोलनाचा मार्ग स्वीकारण्याचा निर्णय घेतला आहे.
प्रमुख मागण्या:
* चिंचपाडा, बोदगाव, मैदाणे परिसरात दिवसा सलग ७ ते ८ तास वीज पुरवठा मिळावा.
* नियमित आणि दर्जेदार (High Voltage) वीज पुरवठा तात्काळ सुरू करावा.
* बिबट्याच्या दहशतीमुळे शेतकऱ्यांच्या जीवितास संरक्षण मिळावे.
यांची होती उपस्थिती:
यावेळी साक्री तालुका काँग्रेस कमिटीचे अध्यक्ष भानुदास गांगुर्डे यांच्या नेतृत्वाखाली गणेश गावित, कांतीलाल भोये, देविदास गावित, युवराज चौरे, कैलास ठाकरे, सतीश चौरे, बापू गावित, राजेंद्र पवार, देविदास भोये यांच्यासह मैदाणे व बोधगाव परिसरातील मोठ्या संख्येने नागरिक उपस्थित होते. मागण्या मान्य न झाल्यास आंदोलन अधिक तीव्र करण्याचा इशारा यावेळी महावितरणच्या अधिकाऱ्यांना देण्यात आला.
Post a Comment
0 Comments