दिवाळी पहाट 'अभ्यंग स्वर पहाट' कार्यक्रमाने नंदुरबारमध्ये संगीत मैफल रंगली!

 नंदुरबार शहर प्रतिनिधी:

दिवाळीच्या मंगलमय पर्वात, पहाटेच्या शांत वातावरणात संगीताची सुमधुर अनुभूती देण्यासाठी नंदुरबार शहरातील संगीत रसिकांसाठी 'अभ्यंग स्वर पहाट' या खास कार्यक्रमाचे आयोजन करण्यात आले होते. श्री जितेंद्र खवळे आणि रत्नदिप पवार यांच्या संयुक्त विद्यमाने नगरपालिकेच्या भारत रत्न अटलबिहारी वाजपेयी सभागृहात ही सुरेल मैफल मोठ्या उत्साहात पार पडली.

या कार्यक्रमाला प्रमुख पाहुणे म्हणून छाया संगीत विद्यालयच्या संचलिका सौ. सुनिता चव्हाण, श्री. चंद्रशेखर चव्हाण, प्रख्यात हृदय रोग तज्ञ डाॅ. दीपक अंधारे, श्रीराम दाऊतखाने आणि ओमकार संगीत साधना विद्यालयाचे श्री. हेमंत पाटील आदी मान्यवर उपस्थित होते.

राग बिलासखानी तोडीने झाली सुरुवात

मान्यवरांच्या हस्ते दीप प्रज्वलन करून कार्यक्रमाची औपचारिक सुरुवात झाली. यानंतर, श्री. हितेश उपासनी यांनी आपल्या अप्रतिम गायनाने 'बिलासखानी तोडी' या रागाचे सादरीकरण करत मैफलीची नांदी केली. पहाटेच्या वेळी शांत आणि गंभीर वातावरणात सादर झालेला हा राग श्रोत्यांसाठी एक अविस्मरणीय अनुभव ठरला.

भजन, गजल आणि भावगीतांची मेजवानी

यानंतर, श्री. विजय पाटील, रणविर अनंता, स्वप्नील खैरनार, हितेश उपासनी, आणि पुजा जैन या प्रतिभाशाली कलाकारांनी विविध प्रकारच्या गीतांचे सादरीकरण करून रसिक श्रोत्यांची मने जिंकली. भजन, अभंग, गजल आणि भावगीत अशा विविध प्रकारांमुळे श्रोत्यांना संगीताच्या अनेक रंगांची मेजवानी मिळाली.

यावेळी सादर झालेल्या 'माझे माहेर पंढरी', 'गोड तुझे रूप', 'बजे मुरलीय बाजे', 'हरी म्हणा तुम्ही गोविंद म्हणा', 'अबीर गुलाल', 'एक राधा एक मीरा', 'अवघे गर्जे पंढरपूर' यांसारख्या भक्तीरसात न्हाऊन काढणाऱ्या रचनांनी वातावरण भक्तीमय झाले. तर 'फुलले रे क्षण माझे फुलले', 'हे सुरांनो चंद्र व्हा', 'विसरुनी सारी दुःखे', 'राधे तुला', 'चंद्र आहे साक्षीला', 'सखी मंद झाल्या तारका', आणि 'केव्हा तरी पहाटे कैवल्याच्या चांदण्याला' यांसारख्या भावगीतांनी आणि 'रंजिशे सही' या गजलेने श्रोत्यांना मंत्रमुग्ध केले.

वाद्यवृंदाची साथ आणि सूत्रसंचालन

या सर्व कलाकारांना हार्मोनियमवर श्री. विजय पाटील, तबल्यावर तुषार पुराणिक, आणि टाळवर मोहित वारुडे यांनी अत्यंत उत्कृष्ट साथ दिली, ज्यामुळे सादरीकरण अधिक प्रभावी झाले.

संपूर्ण कार्यक्रमाचे सूत्रसंचालन आणि अभ्यासपूर्ण निवेदन श्री. शशिकांत घासकडबी यांनी केले. त्यांच्या ओघवत्या वाणीने कार्यक्रमात एक वेगळी उंची प्राप्त झाली.

नंदुरबारच्या या 'अभ्यंग स्वर पहाट' मैफलीला संगीत प्रेमी रसिकांनी मोठ्या संख्येने उपस्थिती लावली होती आणि दिवाळीच्या पहिल्या दिवशी पहाटेच संगीताचा हा अनोखा ठेवा अनुभवला. या यशस्वी आयोजनाबद्दल श्री. जितेंद्र खवळे आणि रत्नदिप पवार यांचे सर्वत्र कौतुक होत आहे.