कासारे-छाईल रस्त्यालगत अत्यवस्थ बिबट्याला वनविभागाने केले जेरबंद; पुढील उपचारांसाठी नाशिक येथे रवाना

 सहसंपादक अनिल बोराडे 

पिंपळनेर: दि. २२.१०.२०२५ रोजी सकाळी ९:०० वाजता कासारे -छाईल रस्त्यालगत श्री. राजेंद्र देसले, रा. कासारे यांच्या मालकीच्या शेतात एक बिबट्या अत्यवस्थ अवस्थेत आढळून आला. नागरिकांनी तात्काळ याची माहिती वन विभागाला दिली.

सदर बातमी मिळताच, वन परिक्षेत्र अधिकारी श्री. ओंकार ढोले यांच्या निर्देशानुसार वन विभागाचे कर्मचारी तात्काळ घटनास्थळी दाखल झाले. बिबट्याची गंभीर स्थिती लक्षात घेऊन तसेच घटनास्थळाचा विचार करून, त्याला बेशुद्ध (Tranquilize) न करता, थेट जेरबंद करण्याचा निर्णय घेण्यात आला.

वन विभागाने आवश्यक साहित्याच्या मदतीने आणि आपल्या कौशल्याचा वापर करत, अत्यवस्थ बिबट्याला सुरक्षितरित्या जेरबंद केले. त्यानंतर त्यास तातडीने वन परिक्षेत्र अधिकारी कार्यालय, पिंपळनेर येथे आणण्यात आले.

येथे पशुवैद्यकीय अधिकारी डॉ. मंगेश हेमाडे यांनी बिबट्याची सखोल तपासणी केली. तपासणीअंती, बिबट्याला तातडीने पुढील विशेष उपचारांसाठी TTC (Transit Treatment Centre), नाशिक येथे पाठविण्यात आले आहे.

यशस्वी मोहीम:

बिबट्याला जेरबंद करण्याची ही अत्यंत महत्त्वाची मोहीम उपवनसंरक्षक, श्री. मो. बा. नाईकवाडी आणि सहायक वनसंरक्षक श्री. योगेश सातपुते यांच्या मार्गदर्शनाखाली यशस्वीरित्या पार पडली. यामध्ये वन परिक्षेत्र अधिकारी श्री. ओंकार ढोले, वनपाल श्री. संदीप मंडलिक, श्री. रामदास चौरे, श्री. दयाराम सोनवणे, वनरक्षक श्री. अनिल घरटे, श्री. देविदास देसाई, श्री. गुलाब बारीस, श्री. राकेश पावरा, श्री. आकाश पावरा, श्री. लखन पावरा, श्री. सुरेश पावरा, श्रीम. रंजना पावरा, श्रीम. ममता पावरा, तसेच वनमजूर श्री. बाजीराव पवार, श्री. मधुकर कुवर आणि श्री. उज्जैन चौधरी यांचा महत्त्वाचा सहभाग होता. वन कर्मचाऱ्यांनी दाखवलेल्या तत्परतेमुळे आणि कौशल्यामुळे अत्यवस्थ बिबट्यावर तातडीने उपचार करणे शक्य झाले आहे.