लोकमान्य टिळक आणि लोकशाहीर अण्णाभाऊ साठे यांच्या कार्याचा आदर्श युवकांनी घ्यावा: डॉ. लहू पवार

 सहसंपादक अनिल बोराडे 

पिंपळनेर - लोकमान्य बाळ गंगाधर टिळक आणि लोकशाहीर अण्णाभाऊ साठे यांच्यासारख्या महान व्यक्तींच्या जयंती आणि पुण्यतिथीच्या कार्यक्रमांतून त्यांच्या कार्याचा आदर्श युवकांनी घ्यायला हवा, असे प्रतिपादन प्राचार्य डॉ. लहू पवार यांनी केले आहे. या कार्यक्रमांच्या माध्यमातून युवकांमध्ये राष्ट्रभक्तीची भावना रुजवून त्यांना प्रेरणा देण्याचा महाविद्यालयाचा उद्देश असल्याचेही त्यांनी सांगितले.

येथील कर्मवीर अण्णासाहेब मारुती पाटील कला, वाणिज्य आणि कै. अण्णासाहेब एन. के. पाटील विज्ञान वरिष्ठ महाविद्यालयाच्या राष्ट्रीय सेवा योजना व आयक्युएसी विभागातर्फे लोकमान्य बाळ गंगाधर टिळकांची १०५ वी पुण्यतिथी आणि लोकशाहीर अण्णाभाऊ साठे यांची जयंती साजरी करण्यात आली. या कार्यक्रमाचे आयोजन प्रतिमा पूजनाने करण्यात आले होते.

महापुरुषांचे विचार युवकांपर्यंत पोहोचवणे गरजेचे

आपल्या मनोगतात प्राचार्य डॉ. लहू पवार म्हणाले, लोकमान्य टिळकांनी बालपणीच मातृपितृछत्र गमावले. पण तरीही खचून न जाता, त्यांनी कायद्याचे शिक्षण पूर्ण केले आणि स्वातंत्र्य लढ्यात सक्रिय सहभाग घेतला. वृत्तपत्रांच्या माध्यमातून त्यांनी जनजागृती केली, ज्यामुळे ते ‘लोकमान्य’ झाले.

ते पुढे म्हणाले, लोकशाहीर अण्णाभाऊ साठे यांनी औपचारिक शिक्षण घेतले नसतानाही सामाजिक साहित्याची निर्मिती करून समाजात आपला वेगळा ठसा उमटवला. त्यांनी पोवाडे आणि शाहिरीच्या माध्यमातून सामाजिक समस्यांवर आवाज उठवला आणि आपले विचार लोकांपर्यंत पोहोचवले, त्यामुळे ते ‘लोकशाहीर’ म्हणून ओळखले जाऊ लागले.

अशा कर्तृत्ववान महापुरुषांची पुण्यतिथी आणि जयंती साजरी करून, त्यांच्या आदर्शांची पेरणी युवकांमध्ये करणे आवश्यक असल्याचे मत डॉ. पवार यांनी व्यक्त केले. तसेच, विद्यार्थ्यांनी या विचारांचा प्रचार आणि प्रसार करून ही प्रेरणा अखंडपणे सुरू ठेवावी, असे आवाहनही त्यांनी केले.

प्रमुख उपस्थिती

या कार्यक्रमाला प्राचार्य डॉ. लहू पवार यांच्यासह राष्ट्रीय सेवा योजनेचे कार्यक्रम अधिकारी प्रा. लोटन गवळी, सहा. कार्यक्रम अधिकारी डॉ. नितीन सोनवणे, डॉ. संजय तोरवणे, आयक्युएसी संयोजक डॉ. संजय खोडके यांच्यासह प्राध्यापक आणि शिक्षकेतर कर्मचारी उपस्थित होते.

कार्यक्रमाचे प्रास्ताविक प्रा. लोटन गवळी यांनी केले. सूत्रसंचालन डॉ. संजय तोरवणे यांनी केले आणि आभार डॉ. नितीन सोनवणे यांनी मानले. कार्यक्रमासाठी महाविद्यालयातील प्रा. मनोज बळसाणे, डॉ. आनंद खरात, डॉ. वाय. एम. नांद्रे, प्रा. सी. एन. घरटे, डॉ. एस. पी. खोडके, डॉ. के. एन. वसावे, डॉ. सतीश मस्के, प्रा. डी. बी. जाधव, प्रा. हितेश वानखेडे, प्रा. प्रथम सूर्यवंशी, प्रा. तुषार तोरवणे, प्रा. भूषण वाघ, प्रा. दीपक नेरकर, प्रा. गावीत, प्रा. बागुल यांच्यासह सर्व शिक्षकेतर कर्मचारी, विद्यार्थी आणि विद्यार्थिनी मोठ्या संख्येने उपस्थित होते.