राजे छत्रपती इंग्लिश मीडियम स्कूलमध्ये श्रीकृष्ण जन्माष्टमी आणि दहीहंडीचा उत्साह

 सहसंपादक अनिल बोराडे 

पिंपळनेर येथील राजे छत्रपती इंग्लिश मीडियम पब्लिक स्कूलमध्ये नुकताच श्रीकृष्ण जन्माष्टमीचा सण मोठ्या उत्साहात साजरा करण्यात आला. या मंगल प्रसंगी शाळेतील विद्यार्थ्यांनी राधा-कृष्णाच्या वेशभूषा करून सर्वांचे लक्ष वेधून घेतले.

कार्यक्रमाची सुरुवात मान्यवरांच्या हस्ते दहीहंडीच्या पूजनाने झाली. यात शाळेचे अध्यक्ष श्री. संभाजी शिवाजीराव अहिरराव, सचिव श्री. रा.ना. पाटील, आणि मुख्याध्यापिका श्रीमती सोनाली पाटील यांच्यासह सर्व शिक्षक-शिक्षिका उपस्थित होत्या.

दहीहंडी उत्सवाचा मुख्य आकर्षण ठरले, शाळेतील पुरुष आणि महिला गोविंदा पथकांनी तयार केलेले चित्तथरारक मानवी मनोरे. आपल्या कौशल्याने त्यांनी दहीहंडी फोडण्याचा थरार अनुभवला. या पथकांना शाळेतर्फे बक्षिसे देऊन गौरवण्यात आले.

यावेळी संस्थेचे अध्यक्ष श्री. अहिरराव आणि मुख्याध्यापिका श्रीमती सोनाली पाटील यांनी आपले मनोगत व्यक्त केले आणि सर्वांना जन्माष्टमीच्या शुभेच्छा दिल्या. कार्यक्रमाच्या शेवटी, सर्व विद्यार्थी आणि शिक्षकांनी विविध नृत्ये सादर करून कार्यक्रमाची शोभा वाढवली.

हा कार्यक्रम यशस्वी करण्यासाठी शाळेतील सर्व शिक्षकांनी विशेष परिश्रम घेतले, ज्यामुळे विद्यार्थी आणि उपस्थितांसाठी हा दिवस अविस्मरणीय ठरला.