पिंपळनेर महाविद्यालयाकडून सशस्त्र सेना ध्वज दिनानिमित्त १० हजार रुपयांचा निधी सुपूर्द

सहसंपादक अनिल बोराडे 

धुळे:पिंपळनेर येथील कर्म. आ. मा. पाटील कला, वाणिज्य व कै. अण्णासाहेब एन. के. पाटील विज्ञान वरिष्ठ महाविद्यालयाचे प्राचार्य डॉ. लहू पवार यांनी महाविद्यालयीन कर्मचाऱ्यांनी जमा केलेला १०,०००/- (दहा हजार) रुपयांचा ध्वज निधी धुळे जिल्हा सैनिक कल्याण अधिकारी मेजर डॉ. निलेश पाटील यांच्याकडे सुपूर्द केला.

सशस्त्र सेना दिवस आणि त्याचे महत्त्व

दरवर्षी ७ डिसेंबर रोजी आपल्या देशाच्या संरक्षण दलातील सैनिकांच्या आणि त्यांच्या कुटुंबाच्या कल्याणासाठी सशस्त्र सेना दिवस साजरा केला जातो. धुळे येथे मा. जिल्हाधिकारी आणि मा. धुळे जिल्हा पोलीस अधीक्षक यांच्यासह विविध मान्यवरांच्या उपस्थितीत हा दिवस साजरा होतो. या दिवशी विविध संस्थांना आर्थिक मदतीसाठी आवाहन केले जाते.

याच आवाहनाला प्रतिसाद देत, पिंपळनेर येथील वरिष्ठ महाविद्यालयातील सर्व प्राध्यापक आणि प्राध्यापकेतर कर्मचाऱ्यांनी देशाप्रती कृतज्ञता व्यक्त करत १०,०००/- रुपये निधी संकलित केला. हा निधी महाविद्यालयाचे प्राचार्य डॉ. लहू पवार यांच्या हस्ते धुळे जिल्हा सैनिक कल्याण अधिकारी मेजर डॉ. निलेश पाटील यांना सैनिक कल्याण निधी म्हणून सुपूर्द करण्यात आला.

७ डिसेंबर हा दिवस देशभरातील विविध संस्था आणि संघटनांकडून जवानांच्या कल्याणासाठी, त्यांच्या आरोग्यासाठी आणि सैनिकांच्या मुला-मुलींना उत्तम शिक्षण मिळावे यासाठी साजरा केला जातो. या उद्दिष्टांसाठी निधी उपलब्ध व्हावा, यासाठी ध्वज निधीचे संकलन केले जाते आणि सैनिकांप्रती अभिमान म्हणून हा दिवस साजरा होतो. राष्ट्रप्रेम आणि निष्ठेपोटी देशातील प्रत्येक संस्था ध्वज दिन निधी संकलनात सहभागी होते. हाच दृष्टिकोन समोर ठेवून, आदिवासी भागातील पिंपळनेर वरिष्ठ महाविद्यालयाने या मोहिमेत आज आपला सहभाग नोंदवला.

याप्रसंगी बोलताना धुळे येथील जिल्हा सैनिकी अधिकारी डॉ. निलेश पाटील यांनी सांगितले की, प्रत्येक शाखा, संख्या आणि क्षमतेनुसार, थोडा का होईना निधी सैनिकांच्या पुनर्वसनासाठी देऊन या कार्यात योगदान देणे हे देशाच्या हिताचे आहे.