नवापूर तालुक्यात प्रशासनाचा नागरिकांसाठी 'महा'उपक्रम! एकाच छताखाली मिळाली विविध शासकीय सेवा

 नवापूर, दि. २७: जिल्हाधिकारी मिताली सेठी मॅडम यांच्या मार्गदर्शनाखाली नवापूर तालुक्यात 'छत्रपती शिवाजी महाराज महाराज्यस्व अभियान समाधान शिबिर २०२५' अंतर्गत नागरिकांसाठी एक महत्त्वाकांक्षी उपक्रम राबविण्यात येत आहे. या अभियानाचाच भाग म्हणून, काल २५ एप्रिल २०२५ रोजी नवापूर तहसील कार्यालयात आयोजित केलेले एक दिवसीय महाराजस्व शिबिर यशस्वी झाले. या शिबिरात नागरिकांना एकाच ठिकाणी विविध शासकीय सेवा आणि आवश्यक दाखले मिळाल्याने त्यांचे चेहरे आनंदाने उजळून निघाले.

तहसीलदार दत्तात्रय जाधव यांच्या नेतृत्वाखाली आणि निवासी नायब तहसीलदार प्रवीण मराठे, संजय गांधी निराधार योजनेचे नायब तहसीलदार दिलीप कुलकर्णी, मंडळ अधिकारी संतोष जाधव यांच्या सक्रिय सहकार्याने हे शिबिर यशस्वी झाले. या शिबिरात तालुक्यातील ग्राम महसूल अधिकारी, महसूल सहाय्यक, महसूल सेवक, महा ई-सेवा केंद्र चालक आणि विविध विभागातील कर्मचाऱ्यांनी एकत्र येत नागरिकांना तत्पर सेवा पुरवली. विशेष म्हणजे, मोठ्या संख्येने उपस्थित असलेल्या ग्रामस्थांनीही या उपक्रमात सक्रिय योगदान दिले.

शिबिरामध्ये नागरिकांना त्यांच्या गरजेनुसार सात-बारा उतारे (६०), खाते उतारे (६०), ड पत्रक (२७), वारस अर्ज (६), पुरवठा अर्ज (४२), उत्पन्न अहवाल (५३) आणि उत्पन्न दाखले (५३) त्वरित उपलब्ध करून देण्यात आले. यासोबतच, जातीचे दाखले (३), संजय गांधी योजनेचे अर्ज (९) आणि आधार नूतनीकरणाची (५) सोय देखील उपलब्ध होती.

या आकडेवारीवरून हे स्पष्ट होते की, प्रशासनाच्या या प्रयत्नांना नागरिकांनी उत्स्फूर्त प्रतिसाद दिला. एकाच ठिकाणी विविध सेवा मिळाल्याने नागरिकांच्या वेळेची आणि श्रमाची बचत झाली, याबद्दल त्यांनी समाधान व्यक्त केले.

या यशस्वी शिबिराच्या आयोजनाबद्दल बोलताना तहसीलदार दत्तात्रय जाधव म्हणाले, "जिल्हाधिकारी मॅडम यांच्या मार्गदर्शनाखाली आम्ही नागरिकांपर्यंत शासकीय सेवा सुलभपणे पोहोचवण्याचा प्रयत्न करत आहोत. या शिबिराला मिळालेला प्रतिसाद पाहून आम्हाला अधिक प्रेरणा मिळाली आहे आणि भविष्यातही असे उपक्रम राबवण्यासाठी आम्ही कटिबद्ध आहोत."

प्रशासनाकडून नागरिकांच्या सोयीसाठी उचललेले हे पाऊल निश्चितच कौतुकास्पद आहे. 'छत्रपती शिवाजी महाराज महाराज्यस्व अभियान' च्या माध्यमातून प्रशासनाने लोकाभिमुख दृष्टिकोन दाखवला आहे, ज्यामुळे सामान्य नागरिकांना शासकीय कार्यालयांचे हेलपाटे मारण्याची गरज भासणार नाही. अशा प्रकारचे उपक्रम इतर तालुक्यांसाठी देखील आदर्श ठरू शकतात.

फोटो ओळ: नवापूर तहसील कार्यालयात आयोजित महाराजस्व शिबिरात दाखले स्वीकारताना नागरिक. सोबत तहसीलदार दत्तात्रय जाधव आणि इतर अधिकारी.