पिंपळनेर:(सहसंपादक अनिल बोराडे)
आगामी गणेशोत्सव आणि ऐतिहासिक १९८ व्या खंडोजी महाराज यात्रा उत्सवाच्या पार्श्वभूमीवर पिंपळनेर शहरात कायदा व सुव्यवस्था अबाधित राखण्यासाठी पिंपळनेर पोलिस ठाण्यात शांतता समितीची महत्त्वपूर्ण बैठक पार पडली. उपविभागीय पोलिस अधिकारी (DYSP) सुधीर पाटील यांच्या अध्यक्षतेखाली ही बैठक पार पडली. उत्सव काळात तब्बल २ लाख भाविकांच्या गर्दीचे आव्हान पाहता, कायदा हातात घेणाऱ्यांची गय केली जाणार नाही, असा थेट इशारा पोलिस प्रशासनाने दिला आहे.
बैठकीतील प्रमुख उपस्थिती
पिंपळनेर नगरपरिषदेच्या नगराध्यक्षा सौ. डॉ. योगिताताई चौरे या बैठकीस प्रमुख अतिथी म्हणून उपस्थित होत्या. याशिवाय उपनगराध्यक्ष योगेश नेरकर, नगरसेवक संभाजी अहिरराव, नायब तहसीलदार सुभाष गांगुर्डे, पिंपळनेर पोलिस ठाण्याचे API नामदेव सहारे, PSI संदिप संसारे, PSI प्रसाद रौदळ, गोपनीय विभागाचे PSI शिरसाठ, डॉ. जितेश चौरे, हाजी जाविद सैय्यद, जुहुर जहागीरदार, महावितरणचे अधिकारी, पत्रकार, विविध गणेश मंडळांचे पदाधिकारी आणि डीजे चालक-मालक मोठ्या संख्येने उपस्थित होते.
१९८ वा खंडोजी महाराज यात्रा महोत्सव: ३ दिवस भक्ती अन् जनसागर
खंडोजी महाराज यात्रा उत्सवातील नामसप्ताह महोत्सव १९ ते २१ सप्टेंबर दरम्यान होणार आहे.
* १९ सप्टेंबर: कत्तलीची रात्र
* २० सप्टेंबर: भव्य कुस्तीची दंगल
* २१ सप्टेंबर: पारंपरिक आदिवासी नृत्य स्पर्धा
महाराष्ट्रासह गुजरात आणि मध्यप्रदेशातून येणाऱ्या तब्बल २ लाख भाविकांमुळे शहरात मोठी गर्दी होणार असून, प्रशासनाकडून सुरक्षेचे कडक नियोजन केले जात आहे.
शांतता बैठकीत ऐरणीवर आलेले गंभीर मुद्दे व मागण्या
* वाहतूक कोंडी व पर्यायी जागा: सामोडे चौफुली व दोन्ही समांतर पुलांवर होणारी वाहतूक कोंडी रोखण्यासाठी नियोजन करण्याची मागणी झाली. समांतर पुलावरील भाजीपाला व फळ विक्रेत्यांना तातडीने पर्यायी जागेवर हलवण्याची मागणी करण्यात आली.
* बसस्थानक परिसरात ट्रॅफिक पोलिस: नगरपरिषद व बसस्थानक परिसरात ट्रॅफिक पोलिस नसल्याने विद्यार्थी, महिला व वृद्धांची कोंडी होते. त्यामुळे येथे तात्काळ विशेष पोलिस बंदोबस्त तैनात करण्याची मागणी झाली.
* नशेखोरांचा अड्डा अन् मोकाट जनावरे: शासकीय कार्यालयांच्या आवारात बसणाऱ्या नशेखोरांवर नियमित गस्त घालून कठोर कारवाईची मागणी करण्यात आली. तसेच रस्त्यावरील मोकाट जनावरांचा तात्काळ बंदोबस्त करण्याचे निर्देश नगरपरिषदेला देण्यात आले.
* वीजतारा व मूर्तींची उंची: गणेशमूर्ती व मंडपाची उंची ठरवताना महावितरणच्या वीजतारांपासून सुरक्षित अंतर राखण्याचे आवाहन करण्यात आले.
"कायदा हातात घ्याल तर कठोर कारवाई!" — DYSP सुधीर पाटील
डीजेच्या वाढत्या आवाजावर आणि आक्षेपार्ह गाण्यांवर कडक बंदी असेल. धार्मिक सलोखा बिघडवणारे कृत्य खपवून घेतले जाणार नाही. उत्सव पारंपरिक पद्धतीने आणि उत्साहात साजरा करा, परंतु नियमांचे उल्लंघन करणाऱ्यांवर पोलिस प्रशासन कठोर कायदेशीर कारवाई करेल, असा स्पष्ट संदेश DYSP सुधीर पाटील यांनी दिला.
गणेशोत्सव व यात्रा महोत्सव निर्विघ्न पार पाडण्यासाठी पोलिस, नगरपरिषद, महसूल आणि महावितरण या सर्व यंत्रणांनी समन्वयाने काम करण्याचा निर्णय या बैठकीत घेण्यात आला.
Post a Comment
0 Comments