पिंपळनेर-सामोडे अंनिस शाखेत स्मृती दिनानिमित्त अहिंसेची शपथ; विवेकवाद, वैज्ञानिक दृष्टिकोन आणि सामाजिक सलोख्याचा जागर

 दाभोलकरांच्या विचारांची मशाल तळागाळात नेण्याचा निर्धार!

पिंपळनेर (विशेष सहसंपादक अनिल बोराडे) :

अंधश्रद्धेच्या अंधाराला विवेकाच्या प्रकाशाने छेद देत वैज्ञानिक दृष्टिकोनाची मशाल पेटविणारे ज्येष्ठ सामाजिक कार्यकर्ते डॉ. नरेंद्र दाभोलकर यांच्या १३व्या स्मृती दिनानिमित्त महाराष्ट्र अंधश्रद्धा निर्मूलन समितीच्या (अंनिस) पिंपळनेर व सामोडे शाखेच्या संयुक्त विद्यमाने विशेष कार्यक्रमाचे आयोजन करण्यात आले होते. या कार्यक्रमात डॉ. दाभोलकर यांच्या स्मृतींना विनम्र अभिवादन करत त्यांचे पुरोगामी, विवेकवादी आणि वैज्ञानिक विचार गावागावांत, वाडी-वस्त्यांत आणि समाजाच्या तळागाळापर्यंत पोहोचविण्याचा ठाम निर्धार करण्यात आला.

अंधश्रद्धा आणि अज्ञानाविरोधातील लढा हा समाजजागृतीचा : सुभाष जगताप

कार्यक्रमाच्या प्रारंभी सुभाष जगताप यांनी प्रास्ताविकातून कार्यक्रमामागील भूमिका विशद केली. अंधश्रद्धा, अज्ञान आणि अवैज्ञानिक रूढी-परंपरांविरोधातील लढा हा केवळ एखाद्या व्यक्तीचा वा संघटनेचा नसून, तो संपूर्ण समाजाच्या विवेकजागृतीचा लढा असल्याचे त्यांनी अधोरेखित केले.

त्यानंतर सामोडे शाखेचे कार्याध्यक्ष देवीदास पाटील यांनी डॉ. नरेंद्र दाभोलकर यांच्या जीवनकार्यावर प्रकाश टाकला. अंधश्रद्धा निर्मूलनासाठी त्यांनी आयुष्यभर केलेला संघर्ष, वैज्ञानिक दृष्टिकोनाचा आग्रह आणि सामाजिक परिवर्तनासाठी त्यांनी उभारलेली चळवळ याविषयी सविस्तर माहिती देत दाभोलकरांचे विचार आजच्या काळात अधिक व्यापकपणे समाजापर्यंत पोहोचविण्याची गरज त्यांनी व्यक्त केली.

अहिंसेची शपथ आणि वैचारिक लढ्याला नवी दिशा

या कार्यक्रमातील प्रमुख क्षण ठरला तो प्रा. शिवप्रसाद शेवाळे यांनी उपस्थितांना दिलेल्या अहिंसा आणि सामाजिक सलोख्याच्या शपथेचा. अंधश्रद्धा व अविवेकाविरुद्धचा संघर्ष हा द्वेष, हिंसा किंवा संघर्षाच्या मार्गाने नव्हे, तर विचार, विवेक, वैज्ञानिक दृष्टिकोन आणि संविधानिक मूल्यांच्या आधारावरच पुढे नेण्याचा निर्धार यावेळी कार्यकर्त्यांनी केला. “विचारांची हत्या करता येत नाही; विचारांची मशाल पुढे नेली जाते!” या भावनेतून डॉ. दाभोलकरांच्या कार्याला अभिवादन करण्यात आले.

गावागावांत विवेकवादाचा जागर करण्याचा संकल्प

डॉ. दाभोलकरांनी उभ्या केलेल्या चळवळीचा मुख्य केंद्रबिंदू सामान्य माणसाला प्रश्न विचारण्याची, सत्य तपासण्याची आणि अंधानुकरणाला नकार देण्याची ताकद देणे हा होता. त्याच विचारांना पुढे नेण्यासाठी पिंपळनेर व सामोडे परिसरात अंनिसच्या माध्यमातून जनजागृती मोहीम अधिक प्रभावी करण्याचा संकल्प या प्रसंगी सोडण्यात आला.

या कार्यक्रमाला पिंपळनेर शहर अध्यक्ष व्ही. एन. जिरे, डी. डी. महाले, देविदास नेरकर, ललित मराठे, शिरीष कुवर, मनीषा भदाणे, प्रा. मीनाक्षी माळी, छाया वाडेकर, रेखा पाटील, भिलाजी जिरे यांच्यासह पिंपळनेर व सामोडे परिसरातील अंनिसचे सर्व पदाधिकारी, सामाजिक कार्यकर्ते आणि नागरिक मोठ्या संख्येने उपस्थित होते.

दाभोलकरांचा लढा थांबलेला नाही!

डॉ. नरेंद्र दाभोलकर यांचे विचार केवळ स्मरणात ठेवणे नव्हे, तर ते प्रत्यक्षात कृतीत उतरविणे हीच त्यांना खरी आदरांजली आहे. अंधश्रद्धेला प्रश्न विचारणे, वैज्ञानिक दृष्टिकोन रुजविणे, सामाजिक सलोखा जपणे आणि विवेकवादी समाजनिर्मितीसाठी सातत्याने कार्य कार्यरत राहणे—याच मार्गाने दाभोलकरांच्या विचारांची ज्योत पुढे नेण्याचा निर्धार कार्यकर्त्यांनी केला. “अंधश्रद्धेच्या अंधाराविरुद्ध विवेकाची मशाल पेटती ठेवू; अहिंसेच्या मार्गाने समाजप्रबोधनाची चळवळ तळागाळापर्यंत पोहोचवू!” असा ठाम संदेश या स्मृती दिनानिमित्त देण्यात आला.