नवापूर वनविभागाची मोठी कारवाई: बोकळझर फाट्यावर सागवान जप्त

 प्रतिनिधी २ एप्रिल २०२६ रोजी रात्रीच्या सुमारास सहाय्यक वनसंरक्षक (प्रा. व वन्य.) नंदुरबार रोशन बुवा, नवापूरचे वनपरिक्षेत्र अधिकारी (प्रा.) अमोल काशीकर, वाहन चालक दीपक पाटील आणि निलेश गावित हे परिसरात रात्रगस्त घालत होते. गस्तीदरम्यान मौजे बोकळझर फाट्यावर एक संशयित स्कुटी (MH-39AA-9278) येताना दिसली. वनविभागाच्या पथकाने वाहन थांबवण्याचा प्रयत्न केला असता, कारवाईच्या भीतीने वाहन चालक अंधाराचा फायदा घेऊन पळ काढण्यात यशस्वी झाला.

जप्त केलेला माल आणि मुद्देमाल

वनविभागाने घटनास्थळावरून स्कुटीची तपासणी केली असता, त्यावरून सागाची अवैध वाहतूक होत असल्याचे निष्पन्न झाले. या कारवाईत खालील मुद्देमाल जप्त करण्यात आला आहे:

 * साग चौरस नग: ०४

 * वाहन: स्कुटी (क्रमांक MH-39AA-9278)

 * अंदाजित किंमत: अंदाजे ३०,००० रुपये

जप्त केलेले वाहन आणि मुद्देमाल शासकीय विक्री आगार, नवापूर येथे पावतीसह जमा करण्यात आला आहे.

वरिष्ठांचे मार्गदर्शन आणि पुढील तपास

सदर यशस्वी कारवाई वनसंरक्षक धुळे श्रीमती नीनू सोमराज, उपवन संरक्षक नंदुरबार संतोष सस्ते, विभागीय अधिकारी (दक्षता पथक) धुळे सदगीर, सहाय्यक वनसंरक्षक नंदुरबार रोशन बुवा आणि वनपरिक्षेत्र अधिकारी नवापूर अमोल काशीकर यांच्या मार्गदर्शनाखाली पार पडली.

या प्रकरणाचा पुढील सखोल तपास वडकळंबीचे वनपाल करत असून, पसार झालेल्या आरोपीचा शोध घेतला जात आहे. वनविभागाच्या या धाडसी कारवाईमुळे लाकूड तस्करांचे धाबे दणाणले आहेत.