सहसंपादक अनिल बोराडे
पिंपळनेर (नवापूर गर्जना वृत्तसेवा): अगदी लहान वयात मोठी स्वप्ने पाहणाऱ्या आणि ती पूर्ण करण्याची जिद्द बाळगणाऱ्या चिमुकल्यांनी पुन्हा एकदा आपल्या कर्तृत्वाचा ठसा उमटवला आहे. पिंपळनेर येथील राजे छत्रपती मार्शल आर्ट्स इंग्लिश मीडियम पब्लिक स्कूलच्या विद्यार्थ्यांनी इंडियन टॅलेंट ऑलंपियाड स्पर्धेत अभूतपूर्व यश संपादन करत संपूर्ण परिसराचे लक्ष वेधून घेतले आहे. या प्रतिष्ठित राष्ट्रीय स्तरावरील स्पर्धेत शाळेने एकूण २ सुवर्ण आणि ४ रजत पदके पटकावत उल्लेखनीय कामगिरी केली आहे. विशेष म्हणजे हे यश केवळ केजी (KG) गटातील विद्यार्थ्यांनी मिळवले असून, त्यांच्या या यशामुळे शाळेची शैक्षणिक गुणवत्ता पुन्हा एकदा अधोरेखित झाली आहे.
या स्पर्धेत यशस्वी ठरलेल्या विद्यार्थ्यांमध्ये ज्युनिअर केजीमधील रजा शाहरुख पिंजारी याने ईव्हीएस विषयात सुवर्ण तर गणित विषयात रजत पदक मिळवले आहे. तसेच अब्दुल्ला मोहम्मद शेख याने गणितात रजत पदक पटकावले. सिनियर केजीमधील नैतिक ललित गांगुर्डे याने इंग्रजी विषयात सुवर्ण पदक मिळवून शाळेच्या शिरपेचात मानाचा तुरा रोवला आहे. याच गटातील शंतनु भूषण भदाणे आणि विघ्नेश अमित रोकडे या विद्यार्थ्यांनी गणित विषयात रजत पदके प्राप्त केली आहेत. या चिमुकल्यांच्या कामगिरीने शैक्षणिक क्षेत्रात पिंपळनेरचे नाव उज्ज्वल झाले आहे.
या यशामागे विद्यार्थ्यांची चिकाटी आणि शिक्षकांचे समर्पित मार्गदर्शन अत्यंत महत्त्वाचे ठरले आहे. विद्या पाटोळे मॅडम आणि आशिष कांबळे सर यांच्या योग्य प्रशिक्षणामुळे विद्यार्थ्यांनी कठीण विषयातही उत्कृष्ट कामगिरी करत यशाची शिखरे गाठली. या उल्लेखनीय यशाबद्दल शाळेचे चेअरमन संभाजी आहिरराव, प्रिन्सिपल सोनाली पाटील, तसेच चव्हाण सर यांनी सर्व यशस्वी विद्यार्थ्यांचे, मार्गदर्शक शिक्षकांचे आणि सहकार्य करणाऱ्या पालकांचे मनःपूर्वक अभिनंदन केले आहे. या शानदार यशामुळे राजे छत्रपती मार्शल आर्ट्स इंग्लिश मीडियम पब्लिक स्कूलने आपली गुणवत्ता आणि विश्वासार्हता पुन्हा एकदा सिद्ध केली असून परिसरात सर्वत्र या यशाचे कौतुक होत आहे.
Post a Comment
0 Comments