नंदुरबार: सौर कृषी पंपाचे सर्वेक्षण करून देण्यासाठी १,००० रुपयांची लाच स्वीकारताना महाराष्ट्र राज्य विद्युत वितरण कंपनीच्या वरिष्ठ तंत्रज्ञाला लाचलुचपत प्रतिबंधक विभागाने (ACB) रंगेहात पकडले. भाऊसाहेब गोरख पाटील (वय ३३) असे अटक करण्यात आलेल्या लोकसेवकाचे नाव आहे.
नेमकी घटना काय?
तक्रारदार शेतकरी यांनी 'मागेल त्याला सौर कृषी पंप' योजनेअंतर्गत आपल्या पत्नीच्या नावे ऑनलाईन अर्ज केला होता. या पंपाच्या सर्वेक्षणासाठी महावितरणकडून २० सप्टेंबर २०२५ ही तारीख देण्यात आली होती. हे सर्वेक्षण करण्यासाठी महावितरणच्या पारोळा (जि. जळगाव) येथील कार्यालयातील वरिष्ठ तंत्रज्ञ भाऊसाहेब पाटील यांनी तक्रारदाराकडे १,५०० रुपयांच्या लाचेची मागणी केली होती. तडजोडीअंती ही रक्कम १,००० रुपये ठरवण्यात आली.
शेतकऱ्याने याबाबत लाचलुचपत प्रतिबंधक विभाग, नंदुरबार यांच्याकडे तक्रार नोंदवली. त्यानंतर , ८ जानेवारी २०२६ रोजी पारोळा तालुक्यातील चोरवड येथे सापळा रचण्यात आला. ठरल्याप्रमाणे १,००० रुपयांची लाच स्वीकारताना भाऊसाहेब पाटील यांना पंच साक्षीदारांसमोर रंगेहात पकडण्यात आले.
एसीबीची पथक आणि कारवाई
ही कारवाई लाचलुचपत प्रतिबंधक विभाग, नंदुरबारच्या पथकाने केली. यामध्ये:
मार्गदर्शन: श्री. भारत तांगडे (पोलीस अधीक्षक, नाशिक), श्री. माधव रेड्डी (अपर पोलीस अधीक्षक) आणि श्री. सुनील दोरगे (अपर पोलीस अधीक्षक).
सापळा अधिकारी: श्री. प्रशांत भरते (पोलीस उप अधीक्षक, एसीबी नंदुरबार).
तपास: पोलीस निरीक्षक श्रीमती स्मिता नवघरे करत आहेत.
नागरिकांना आवाहन
लाचलुचपत प्रतिबंधक विभागाने आवाहन केले आहे की, जर कोणत्याही शासकीय कामासाठी लाचेची मागणी केली जात असेल, तर तात्काळ खालील क्रमांकावर संपर्क साधावा:
टोल फ्री क्रमांक: १०६४
व्हॉट्सॲप क्रमांक: ९४२३९४१०६४
Post a Comment
0 Comments