सहसंपादक अनिल बोराडे
प्रश्नमंजुषा स्पर्धेत जागृती सावंत, विभावरी बोरसे आणि ऋतुजा पाटील यांनी पटकाविले यश
पिंपळनेर येथील मनकर्णाबाई विनायकराव मराठे महिला शिक्षणशास्त्र महाविद्यालयाच्या राष्ट्रीय सेवा योजना (NSS) विभागाच्या वतीने 'क्रांतीज्योती सावित्रीबाई फुले जयंती' मोठ्या उत्साहात साजरी करण्यात आली. या निमित्ताने आयोजित प्रश्नमंजुषा स्पर्धेत विद्यार्थिनींनी उत्स्फूर्त सहभाग नोंदवून सावित्रीबाईंच्या कार्याप्रती आदर व्यक्त केला.
कार्यक्रमाच्या अध्यक्षस्थानी महाविद्यालयाचे प्राचार्य डॉ. सतीश पाटील होते. प्रारंभी क्रांतीज्योती सावित्रीबाई फुले यांच्या प्रतिमेस पुष्पहार अर्पण करून अभिवादन करण्यात आले.
सावित्रीबाईंचे विचार आजच्या काळाची गरज
अध्यक्षीय भाषणात डॉ. सतीश पाटील यांनी सावित्रीबाईंचे शैक्षणिक योगदान आणि सामाजिक क्रांतीतील महत्त्व अधोरेखित केले. महात्मा फुले यांच्या तीन पत्रांमधील मजकूर आणि त्याची आजच्या काळातील उपयुक्तता स्पष्ट करताना त्यांनी स्त्री-सक्षमीकरणासाठी फुले दाम्पत्याने केलेल्या संघर्षाची माहिती दिली.
प्रमुख पाहुण्या प्रा. त्रिशिला साळवे यांनी महात्मा फुले यांना ‘सिस्टीम बिल्डर’ असे संबोधले. त्या म्हणाल्या की, "फुले दाम्पत्य खाजगी आणि सार्वजनिक जीवनात एकसमान जगत होते, म्हणूनच त्यांच्या हातून अजरामर सामाजिक कार्य घडले. सावित्रीबाईंनी प्लेगच्या साथीच्या काळात स्वतःचा जीव धोक्यात घालून रुग्णसेवा केली, तसेच समाजाला स्वावलंबन व स्वाभिमानाची शिकवण दिली."
तरुणांनी आदर्श घेण्याचे आवाहन
प्रा. व्ही. एम. वेशी यांनी सावित्रीबाईंना 'थोर शिक्षणतज्ज्ञ आणि पहिली कवयित्री' म्हणून गौरविले. पिढ्यानपिढ्या शिक्षणापासून वंचित असलेल्या समाजाला प्रवाहात आणण्याचे श्रेय त्यांनी फुले दाम्पत्याला दिले. प्रा. एन. एस. खैरनार यांनीही आजच्या समाजाने या महापुरुषांचा आदर्श समोर ठेवून वाटचाल करण्याचे आवाहन केले. मोहिनी पगारे, रेखा पवार, ऐश्वर्या निकम आणि जागृती पाटील या विद्यार्थिनींनीही आपली मनोगते व्यक्त केली.
प्रश्नमंजुषा स्पर्धेचा निकाल
कार्यक्रमाचे खास आकर्षण असलेल्या सावित्रीबाईंच्या जीवनावर आधारित प्रश्नमंजुषा स्पर्धेचा निकाल पुढीलप्रमाणे राहिला:
* प्रथम क्रमांक: जागृती किरण सावंत
* द्वितीय क्रमांक: विभावरी सुरेश बोरसे
* तृतीय क्रमांक: ऋतुजा श्रीकांत पाटील
यशस्वी विद्यार्थिनींचा मान्यवरांच्या हस्ते गौरव करण्यात आला. कार्यक्रमाचे प्रास्ताविक हर्षदा गावीत यांनी केले, सूत्रसंचालन ऐश्वर्या निकम यांनी केले, तर आभारप्रदर्शन विभावरी बोरसे यांनी मानले. याप्रसंगी महाविद्यालयातील कर्मचारी व विद्यार्थिनी मोठ्या संख्येने उपस्थित होत्या.
Post a Comment
0 Comments