विसरवाडी पोलिसांची तत्परता; ४ लाखांचे २० हरवलेले मोबाईल मूळ मालकांना परत

प्रतिनिधी: गणेश सोनवणे 

नवापूर: विसरवाडी पोलीस ठाण्याच्या मोबाईल शोध पथकाने उत्कृष्ट कामगिरी बजावत पोलीस ठाण्याच्या हद्दीतून गहाळ झालेले तब्बल ४ लाख १० हजार २९३ रुपये किमतीचे एकूण २० मोबाईल शोधून काढले आहेत. दिनांक २० नोव्हेंबर २०२५ रोजी उपविभागीय पोलीस अधिकारी श्री. संजय महाजन यांच्या हस्ते हे मोबाईल मूळ मालकांना सन्मानाने परत करण्यात आले.

पोलिसांनी दिलेल्या माहितीनुसार, विसरवाडी पोलीस ठाण्याच्या हद्दीतून नागरिकांचे मोबाईल गहाळ झाले होते. याप्रकरणी मोबाईल शोध पथकाने तांत्रिक विश्लेषणाच्या आधारे तपास करत नंदुरबार, धुळे जिल्ह्यासह इतर राज्यातूनही हे २० मोबाईल हस्तगत करण्यात यश मिळवले. आपला हरवलेला महागडा मोबाईल पुन्हा सुस्थितीत मिळाल्यामुळे नागरिकांनी समाधान व्यक्त करत विसरवाडी पोलिसांच्या या सकारात्मक कामाचे कौतुक केले.

ही यशस्वी कारवाई पोलीस अधीक्षक श्री. श्रवण दत्त, अपर पोलीस अधीक्षक श्री. आशीत कांबळे आणि उपविभागीय पोलीस अधिकारी श्री. संजय महाजन यांच्या मार्गदर्शनाखाली करण्यात आली. विसरवाडी पोलीस स्टेशनचे सहाय्यक पोलीस निरीक्षक नरेंद्र साबळे, पोलीस कॉन्स्टेबल गणेश सोलंकी आणि पोलीस कॉन्स्टेबल दिनेश पावरा यांच्या पथकाने हा तपास पूर्ण करून मोबाईल हस्तगत करण्याची कामगिरी बजावली आहे.